“Termiz shahrida o‘tkazilgan “Yangi Oʻzbekiston bunyodkorlari” respublika kasbiy mahorat tanlovi yoshlarning kasbiy salohiyati va amaliy ko‘nikmalarini namoyon etdi. Tanlovda oshpazlik, sartaroshlik, avtomobillarga texnik xizmat ko‘rsatish, kompyuter grafikasi, payvandlash, elektromontaj kabi bir qator yo‘nalishlarda qizg‘in bellashuvlar bo‘lib o‘tdi.
Ishtirokchilar nazariy bilim bilan birga amaliy mahoratini ham sinovdan o‘tkazib, o‘z kasbiga bo‘lgan qiziqishi va ijodkorligini ko‘rsatdi. Hakamlar ish sifatini, innovatsion yondashuvni hamda texnika xavfsiziga rioya etilishini asosiy mezon sifatida baholadi.
Mazkur tanlov yoshlarni kasb-hunarga yo‘naltirish, zamonaviy mutaxassislarni tayyorlash hamda bandlikni ta’minlashda muhim ahamiyat kasb etmoqda.
