Sport yoshlar salomatligini mustahkamlash, jismoniy chiniqish va irodani tarbiyalashda muhim o‘rin tutadi. Shu ma’noda talabalar o‘rtasida o‘tkaziladigan nufuzli musobaqalar ularning sport mahoratini oshirish va hududlararo sog‘lom raqobatni kuchaytirishga xizmat qiladi.
Termiz davlat universiteti mezbonligida “Talabalar ligasi” sport musobaqalarining kurash turi bo‘yicha Respublika final bosqichi yuqori saviyada tashkil etildi. Unda mamlakatimizning 14 ta hududidan kelgan 260 nafar sportchi-talaba g‘oliblik uchun kuch sinashdi.
Yakuniy natijalarga ko‘ra, umumjamoa hisobida Termiz davlat universiteti — 1-o‘rin (5 ta oltin, 2 ta bronza):
Qoraqalpog‘iston davlat universiteti — 2-o‘rin (2 ta oltin, 2 ta kumush, 5 ta bronza);
Jizzax davlat pedagogika universiteti — 3-o‘rin (2 ta oltin, 1 ta kumush);
Navoiy davlat universiteti — 3-o‘rin (2 ta oltin, 1 ta bronza)ni zabt etdi.
Musobaqa yakunida barcha ishtirokchilar matonat va yuksak mahoratni namoyon etgani e’tirof etildi.
