Aholi salomatligini muhofaza qilish va tibbiy xizmatlar sifatini oshirish har bir davlat taraqqiyotining muhim mezonlaridan biridir. Zamonaviy boshqaruv, shaffof nazorat va ilmiy tahlil tizimini yo‘lga qo‘yish esa sohada samaradorlikni yanada kuchaytiradi.
Shu maqsadda Prezidentning “Sog‘liqni saqlash tizimida boshqaruv samaradorligini oshirish chora-tadbirlari to‘g‘risida”gi farmoni qabul qilindi. Unga ko‘ra, Salomatlik va strategik rivojlanish instituti negizida Aholi salomatligini tahlil qilish ilmiy-tadqiqot markazi tashkil etiladi. Markaz aholi salomatligi ko‘rsatkichlarini tahlil qilish, prognozlash hamda sog‘liqni saqlash siyosati samaradorligini baholash bilan shug‘ullanadi.
Shuningdek, Sog‘liqni saqlash vazirligi huzurida Klinik audit inspeksiyasi va Kontent mediamarkazi faoliyati yo‘lga qo‘yiladi. Ushbu tizim tibbiy xizmatlar sifati, bemorlar xavfsizligi va axborot siyosatini samarali tashkil etishga xizmat qiladi. Farmonga muvofiq, soha xodimlari malakasi baholanib, rahbar kadrlarga zamonaviy tibbiyot menejmenti va moliyaviy boshqaruv bo‘yicha yangi talablar joriy etiladi.
