Hududlarda infratuzilmani yaxshilash, aholi uchun qulay va xavfsiz harakatlanish sharoitlarini yaratish maqsadida Sariosiyo tumanida izchil ishlar olib borilmoqda. Ana shunday sa’y-harakatlar natijasida Darag‘iston mahallasida homiylik asosida yangi ko‘prik qurilishi yakunlanib, foydalanishga topshirildi.
Tantanali ochilish marosimida Sariosiyo tumani hokimi Odiljon Yaqubov ishtirok etdi. Tadbir davomida yangi ko‘prikning aholi hayotidagi ahamiyati alohida ta’kidlandi.
Mazkur inshoot mahalla aholisi uchun muhim ijtimoiy ahamiyat kasb etib, uning ishga tushirilishi natijasida qatnovdagi mavjud qiyinchiliklar bartaraf etildi. Endilikda aholining harakatlanishi yanada qulaylashib, hududlar o‘rtasidagi masofa amalda qisqardi.
Tuman hokimi qurilish ishlarida faol ishtirok etgan mutaxassislar hamda homiy tashkilotlarga minnatdorlik bildirib, ularning bu ezgu tashabbusi aholi farovonligiga xizmat qilishini ta’kidladi.
Tashrif doirasida mahalla aholisi bilan sayyor qabul ham o‘tkazilib, fuqarolarning murojaatlari tinglandi va ularni hal etish yuzasidan mutasaddilarga tegishli topshiriqlar berildi.
