Sariosiyo tumanida 120 o‘rinli zamonaviy maktabgacha ta’lim tashkiloti foydalanishga topshirildi. Yangi 40-sonli bog‘chaning ochilish marosimida tuman hokimi Odiljon Yaqubov, tegishli bo‘lim mas’ullari, ota-onalar, nuroniylar va jamoatchilik vakillari ishtirok etdi.
Loyiha doirasida “Surxon Qurilish” xususiy korxonasi tomonidan 300 million so‘m mablag‘ evaziga 93-sonli umumta’lim maktabining bo‘sh turgan binosi rekonstruksiya qilinib, zamonaviy talablarga mos muassasa barpo etildi. Bog‘chada oshxona, musiqa zali, bolalar o‘yin maydonchalari, ochiq ayvonlar hamda ta’lim-tarbiya jarayoni uchun zarur barcha shart-sharoitlar yaratilgan.
Mazkur yangi maskan hududdagi bolalarni maktabgacha ta’lim bilan qamrab olishni kengaytirish, ularning har tomonlama rivoji uchun mustahkam zamin yaratishga xizmat qiladi.
