Termiz davlat universitetiga qarashli Darband o‘quv-amaliyot bazasida keng ko‘lamli qurilish va bunyodkorlik ishlari jadal davom etmoqda. Hududning boy tabiiy resurslari va infratuzilmasidan samarali foydalanish asosida 10 dan ortiq yo‘nalishda “spin-off” biznes loyihalarini rivojlantirish uchun zamonaviy maskan barpo etilmoqda.
Mazkur baza nafaqat TerDU, balki vohadagi boshqa oliy ta’lim muassasalari talabalari uchun ham nazariy bilimlarni amaliyot bilan uyg‘unlashtirish imkonini beruvchi muhim ilmiy-amaliy maydonga aylanmoqda. Shuningdek, uning tabiiy va qulay sharoiti sportchi-talabalar uchun o‘quv-yig‘in mashg‘ulotlarini tashkil etishda ham katta ahamiyat kasb etadi.
Amalga oshirilayotgan bunyodkorlik ishlari natijasida Darband bazasi zamonaviy ilm-fan, innovatsiya va amaliy tajriba markazi sifatida yoshlar salohiyatini rivojlantirishda muhim o‘rin egallashi kutilmoqda.
