Oʻzbekistonda davlat idoralarida qogʻoz sarfini keskin kamaytirish va ish jarayonlarini toʻliq raqamlashtirishga qaratilgan yangi choralar joriy etilmoqda. 18-martdagi hukumat qaroriga muvofiq, endilikda qogʻozdan foydalanish aniq me’yorlar asosida cheklanadi.
2026-yil 1-iyunga qadar barcha tashkilotlarda ishlatilgan qogʻozlarni yigʻish va qayta ishlash tizimi yoʻlga qoʻyiladi. 1-maydan boshlab esa qogʻoz, siyoh va printer xarajatlari har yili kamida 15 foizga qisqartirib boriladi.
Shuningdek, printerlardan markazlashgan holda foydalanish tartibi joriy etilib, har 20 nafar xodimga 1 dona qurilma ajratiladi. Har oy “Qogʻozsiz bir kun” ekoaksiyasi oʻtkazilishi ham belgilandi.
Mazkur yangiliklar nafaqat byudjet tejamkorligini ta’minlaydi, balki ekologiyani asrash va zamonaviy raqamli boshqaruv tizimiga oʻtishni tezlashtiradi.
