Toshkent shahrida jamoat transporti tizimini zamonaviy va qulay qilish maqsadida “Aqlli bekatlar” o‘rnatish ishlari boshlanadi, deb xabar berdi Yo‘l harakatini tashkil etish markazi. Innovatsion bekatlar xavfsizlik va qulaylikni birinchi o‘ringa qo‘yadi: har bir bekat markazlashgan kuzatuv tizimiga ulangan videokameralar bilan jihozlanadi, favqulodda holatlar uchun “SOS” tugmasi mavjud bo‘ladi, imkoniyati cheklangan fuqarolar uchun maxsus kutish joylari tashkil etiladi.
Shuningdek, elektron monitorlar orqali avtobus jadvali ko‘rsatiladi, tezkor xaridlar uchun vending qurilmalari o‘rnatiladi. Ushbu yangiliklar jamoat transportidan foydalanishni xavfsiz, qulay va zamonaviy darajaga olib chiqadi. “Aqlli bekatlar” qayerlarda o‘rnatilishi haqida qo‘shimcha ma’lumotlar Markaz tomonidan e’lon qilinadi.
