Boysun tumanida yoshlar bandligini ta’minlash va ularni tadbirkorlikka jalb etish maqsadida qator uchrashuv hamda amaliy tadbirlar tashkil etildi.
Ma’lumotlarga ko‘ra, tumanda 326 nafar yosh ishsiz sifatida ro‘yxatda turibdi. Hisobot davriga qadar ularning 33 nafari doimiy ish o‘rinlariga joylashtirildi. Shuningdek, 8 nafar yoshga tadbirkorlik faoliyatini boshlashi uchun kredit ajratilib, 6 nafariga dehqonchilik bilan shug‘ullanish uchun yer maydonlari berildi. Bundan tashqari, 45 nafar yosh tartibli mehnat migratsiyasi orqali ish bilan ta’minlandi, 15 nafari esa kasb-hunarga o‘qitishga yo‘naltirildi.
Tadbir davomida yana 196 nafar ishsiz yoshga subsidiya asosida kompyuter jamlanmalari, qurilish-ta’mirlash uskunalari hamda qandolat mahsulotlari tayyorlash uchun pechlar topshirildi.
Mutasaddilar ishtirokida o‘tgan uchrashuvlar yoshlarning o‘z biznesini boshlashi, doimiy daromad manbaiga ega bo‘lishi hamda tumanda bandlik darajasini oshirishga xizmat qilishi ta’kidlandi.
