Termiz shahridagi “Manguzar” mahallasida Davlat Investitsiya dasturi doirasida 504 o‘rinli o‘quv binosi, 222 o‘rinli yotoqxona hamda zamonaviy sport zalini o‘z ichiga olgan ixtisoslashtirilgan maktab-internati barpo etilmoqda.
Viloyat hokimi Ulug‘bek Qosimov mazkur obyektga tashrif buyurib, qurilish-ta’mirlash ishlari holati bilan tanishdi. Mas’ullar tomonidan loyiha doirasida amalga oshirilayotgan ishlar va keyingi bosqichlar bo‘yicha axborot berildi.
O‘rganish jarayonida qurilish ishlari belgilangan reja-grafikdan ortda qolayotgani qayd etilib, ishlarni jadallashtirish, sifat ko‘rsatkichlariga qat’iy rioya etish hamda obyektni barcha zarur infratuzilmalar bilan to‘liq ta’minlagan holda belgilangan muddatda foydalanishga topshirish yuzasidan tegishli topshiriqlar berildi.
Shuningdek, viloyat rahbariga hududda amalga oshirilayotgan ko‘p qavatli turar joylar va boshqa ijtimoiy ahamiyatga ega loyihalar ijrosi haqida ham ma’lumot berildi.
