Hukumat qarori bilan ayrim toifadagi talabalar uchun muhim ijtimoiy qo‘llab-quvvatlov joriy etildi. Endilikda davlat oliy ta’lim tashkilotlarida kunduzgi ta’lim shaklida tahsil olayotgan, oilasi Ijtimoiy reyestrda “kambag‘allik chegarasidagi oila” sifatida qayd etilgan talabalarining talabalar turar joylarida yashash xarajatlari davlat byudjeti hisobidan qoplab beriladi.
Mazkur imtiyoz talabaning grant yoki to‘lov-kontrakt asosida o‘qishidan qat’i nazar amal qiladi va 12 oy davomida saqlanib qoladi. Shuningdek, ushbu toifadagi talabalar davlat OTMlarning talabalar turar joylariga navbatsiz va ustuvor tartibda joylashtiriladi.
Yaratilgan bu qulaylik talaba-yoshlarni ijtimoiy tashvishlardan xalos etib, bor e’tiborini bilim olishga, o‘z ustida ishlashga va kasbiy salohiyatini oshirishga qaratishiga xizmat qiladi. Bugun berilayotgan imkoniyatlar yoshlar uchun ishonch va tayanch bo‘lib, ular esa bu e’tiborga puxta bilim, izlanish va mas’uliyat bilan javob berishlari lozim.
Davlat yaratgan sharoitlardan unumli foydalangan holda, bilimli va jamiyat uchun foydali inson bo‘lib yetishish — bugungi talaba yoshlarning eng muhim vazifasidir.
