Termiz tumani Tibbiyot birlashmasining “Yangiariq” filiali hududida joylashgan tibbiyot muassasalari yillar davomida rekonstruksiya qilinmagani sababli abgor holatga kelib qolgan edi. Davlat rahbarining ko‘rsatmalari hamda Hukumat qarorlari asosida ushbu filialdagi tibbiyot maskanlari bosqichma-bosqich qayta qurilib, zamonaviy shart-sharoitlar bilan ta’minlandi.
Eski obyekt o‘rnida 5 milliard 225 million so‘mlik loyiha doirasida barpo etilgan, hududdagi 12 mingdan ortiq aholiga xizmat ko‘rsatish quvvatiga ega yangi poliklinika binosi foydalanishga topshirildi.
Viloyat hokimi Ulug‘bek Qosimov mazkur poliklinikada bo‘lib, yaratilgan sharoitlar hamda aholiga ko‘rsatilayotgan tibbiy xizmatlar sifati bilan tanishdi. Soha mas’ullari tomonidan yo‘lga qo‘yilgan xizmat turlari va “Elektron poliklinika” tizimining joriy etilishi haqida atroflicha ma’lumot berildi.
