Muzrabot tumanining “Oriyat” mahallasida aholini barqaror daromad manbayiga ega qilish, tomorqalardan samarali foydalanish hamda issiqxonachilik faoliyatini rivojlantirish maqsadida amaliy seminar tashkil etildi. Seminar Termiz tumani, “Qahramon” mahallasida yashovchi, “Do‘stlik” ordeni sohibi, tajribali tadbirkor, dehqon xo‘jaligi rahbari Boboyor Xolboyev ishtirokida o‘tkazildi.
Seminar davomida issiqxona sharoitida yetishtiriladigan pomidor, bodring, qalampir, bulg‘or qalampiri va ko‘katlarning serhosil navlari, ularni parvarishlash, hosildorlikni oshirish, xarajatlarni kamaytirish hamda mahsulotlarni bozorga chiqarish bo‘yicha amaliy tavsiyalar berildi. Shuningdek, tomorqalarda issiqxona qurish orqali yil davomida daromad olish va oilaviy tadbirkorlikni yo‘lga qo‘yish masalalari muhokama qilindi.
Tadbir yakunida ishtirokchilar o‘zlarini qiziqtirgan savollarga javob olib, issiqxonachilik yo‘nalishida faoliyat boshlash uchun zarur bilim va ko‘nikmalarga ega bo‘ldilar.
