Mahallalar infratuzilmasini rivojlantirish maqsadida Angor tumanida qator loyihalar amalga oshirilmoqda. Jumladan, 9 ta mahallada O‘zbekiston Respublikasi Iqtisodiyot va moliya vazirligi, Islom taraqqiyot banki hamda BMT Taraqqiyot dasturi (BMTTD) hamkorligida infratuzilma yo‘nalishidagi loyihalarni amalga oshirish rejalashtirilgan.
Ushbu ishlar “Qishloq joylarni kompleks rivojlantirish” loyihasining ikkinchi bosqichi doirasida olib borilmoqda. Xususan, “Karvon” va “Chinobod” mahallalarida piyodalar yo‘lakchalari qurilishi ishlari izchil davom etmoqda.
“Karvon” mahallasining “Oqsaroy” ko‘chasida umumiy uzunligi 2,1 kilometr bo‘lgan piyodalar yo‘lakchasi barpo etilishi rejalashtirilgan bo‘lib, hozirga qadar 800 metr masofada beton yotqizish ishlari yakunlandi. Ayni paytda qolgan qismda qurilish ishlari belgilangan reja asosida davom ettirilmoqda.
