Madaniyat vazirligida milliy askiya va qiziqchilik san’atini ijtimoiy tarmoqlarda keng targ‘ib etishga qaratilgan audiovizual asarlar yaratish bo‘yicha tanlov g‘oliblarini taqdirlash marosimi bo‘lib o‘tdi. Tadbirda madaniyat vazirining birinchi o‘rinbosari Avazxon Tadjixanov ishtirok etib, g‘oliblarga mukofotlarni topshirdi.
Tanlov natijalariga ko‘ra, 5 nafar ijodkorning audiovizual asarlari g‘olib deb topildi. Ular Bahodir Fozilov, Bahodir Berdimuratov, Erkinjon Jo‘lliyev, Nodirbek Nuriddinov hamda Javlonbek Rahmonov bo‘lib, har bir ijodkor bazaviy hisoblash miqdorining 50 barobari miqdoridagi bir martalik pul mukofoti bilan taqdirlandi.
Shuningdek, tadbir doirasida “O‘zbekiston so‘z ustalari” kitob-albomining birinchi jildi taqdimoti ham o‘tkazildi. Mazkur nashrda milliy askiya va qiziqchilik san’atining yetuk namoyandalari hamda ularning ijodiy faoliyati yoritilgan.
Mazkur tanlov Prezidentning PQ–222-son qarori ijrosi doirasida tashkil etilib, milliy hazil-mutoyiba san’atini zamonaviy axborot makonida rivojlantirish va ijodkorlarni qo‘llab-quvvatlashga xizmat qiladi.
