Surxondaryo viloyatida uchta yirik turizm markazini tashkil etish ishlari boshlab yuborildi. Shulardan biri — tog‘li hududda joylashgan, 615 gektar maydonni qamrab oluvchi “Sangardak” turizm markazidir.
Mazkur loyiha “Turonbank” hamda xorijiy kompaniyalar hamkorligida ishlab chiqilgan zamonaviy master-reja asosida amalga oshirilmoqda. Loyiha tog‘lar bag‘ridagi betakror tabiiy muhitni saqlagan holda, ichki va tashqi sayyohlar uchun qulay va jozibador turizm infratuzilmasini yaratishni ko‘zda tutadi.
Ayni paytda majmua hududida tog‘ dor yo‘li, mehmonxonalar, restoranlar, kapsula uylar, bungalovlar, mehmon uylari, savdo bozorchasi, avtoturargohlar hamda turli xizmat ko‘rsatish obyektlarining qurilishi jadal davom etmoqda.
Loyiha amalga oshirilishi natijasida hududda yangi ish o‘rinlari yaratiladi, mahalliy iqtisodiyot rivojlanadi hamda Sangardak mamlakatimizdagi eng yirik va istiqbolli sayyohlik yo‘nalishlaridan biriga aylanishi kutilmoqda.
