“Kambag‘allikdan farovonlik sari” dasturi doirasida Surxondaryo viloyatida joriy yilning o‘tgan 9 oyida 23,3 ming oila kambag‘allikdan chiqarildi. Natijada, viloyatda kambag‘allik darajasi yil boshidagi 9,3 foizdan 5,5 foizgacha qisqardi.
Viloyat hokimining Jarqo‘rg‘on tumanidagi navbatdagi manzili “Yoshlik” mahallasi bo‘lib, u yerda kambag‘al oilalar reyestriga kiritilgan fuqarolar bilan olib borilayotgan ishlar, shuningdek, ularni farovon oilalarga aylantirish bo‘yicha belgilangan vazifalar ijrosi o‘rganildi.
Tashrif davomida ishlar tashkil etilishida qator kamchiliklar mavjudligi qayd etildi. Jumladan, xatlov ishlarini sifatli o‘tkazish va chora-tadbirlarni manzilli tashkil etish zarurligi ta’kidlanib, mas’ullarga aniq topshiriqlar berildi.
Shuningdek, mahallada istiqomat qiluvchi Eshqobil Mamatmurodov xonadoniga ham borildi. Uning tomorqadan samarali foydalanish bo‘yicha tajribasi bilan tanishildi. Xonadon egasi issiqxonada limon parvarishi, oziq-ovqat mahsulotlari yetishtirish, chorvachilik va parrandachilik kabi yo‘nalishlarni yo‘lga qo‘ygan.
Viloyat rahbari xonadon egasi mehnatini yuqori baholab, tomorqasidan samarali foydalanmayotgan fuqarolarni mazkur xonadon tajribasi bilan tanishtirish bo‘yicha mas’ullarga ko‘rsatmalar berdi.
