Vazirlar Mahkamasining 25-fevraldagi 78-son qaroriga muvofiq “Yoshlar daftari” jamg‘armasi faoliyati takomillashtirildi. Yangi tartiblar ijtimoiy yordamlarni yanada shaffof, manzilli va nazoratli mexanizm asosida ajratishni nazarda tutadi.
Endilikda “Yoshlar daftari”ga 14–30 yoshdagi Ijtimoiy reestrga kiritilgan oilalar a’zolari (12 turdagi yordamdan biri uchun), shuningdek oila a’zosiga to‘g‘ri keladigan oylik daromadi minimal iste’mol xarajatlarining ikki baravaridan oshmagan yoshlar (davolanish yordami uchun) kiritiladi.
Qarorga ko‘ra, jamg‘arma mablag‘lari orqali ajratiladigan 12 turdagi ijtimoiy yordamlar Yagona interaktiv davlat xizmatlari portali hamda Yoshlar yagona elektron platformasi orqali rasmiylashtiriladi. Yordam oluvchi yoshlar bilan ijtimoiy shartnoma tuziladi va uning bajarilishi elektron platforma orqali avtomatik monitoring qilinadi.
Shuningdek, shartnoma talablarini yuqori darajada bajargan yoshlarni rag‘batlantirish, yordamni shartnoma ijrosiga qarab ajratish hamda yoshlar yetakchisi tavsiyasi asosida safarbarlik chaqiruvi rezervidagi harbiy xizmatni bepul o‘tash tartiblari belgilandi.
Mazkur o‘zgarishlar ijtimoiy ko‘makni aniq ehtiyojmand yoshlarga yetkazish, ularning mas’uliyatini oshirish va salohiyatini ro‘yobga chiqarishga xizmat qiladi.
