Prezidentimizning xalqparvar siyosati natijasida mamlakatimizda nogironligi bo‘lgan shaxslarning jamiyat hayotidagi faol ishtiroki tobora kengaymoqda. Ularning mehnat va turmush sharoitlarini yaxshilash, ijtimoiy himoya hamda bandligini ta’minlash bo‘yicha keng ko‘lamli islohotlar amalga oshirilmoqda.
Surxondaryo viloyati hokimi Ulug‘bek Qosimov Termiz shahridagi “Guliston” mahallasida joylashgan suzish havzasida o‘rganishlar olib bordi. Mazkur majmua ilgari berilgan topshiriqlar asosida zamonaviy talablarga mos tarzda ta’mirlanib, yosh sportchilar uchun qulay sharoitlar yaratildi. Hokim sportchilar bilan suhbatlashib, ularning mashg‘ulot jarayonlarini ko‘zdan kechirdi.
Suzish sportini ommalashtirish, yoshlarni xalqaro musobaqalarga tayyorlash hamda sport infratuzilmasini takomillashtirish bo‘yicha aniq topshiriqlar belgilandi. Shuningdek, Ijtimoiy himoya agentligi vakillari nogironligi bo‘lgan shaxslarni ish bilan ta’minlash borasida amalga oshirilayotgan ishlar haqida ma’lumot berdi.
Tadbirkorlar uchun soliq va boshqa imtiyozlar joriy etilgani nogironligi bo‘lgan fuqarolarning iqtisodiy faolligini oshirishga xizmat qilmoqda. Shu yo‘nalishda mos ish o‘rinlarini kvotalash, bandlikni kengaytirish va ijtimoiy qo‘llab-quvvatlash mexanizmlarini kuchaytirish vazifalari belgilandi.
Bu kabi tashabbuslar — har bir fuqaro, jumladan nogironligi bo‘lgan insonlarning ham jamiyatda munosib o‘rin egallashi va faol hayot kechirishi uchun yaratilayotgan imkoniyatlarning amaliy ifodasidir.
