O‘zbekiston “Oliy ta’limga oid malakalarni tan olish to‘g‘risidagi global konvensiya”ga qo‘shilmoqda. Ushbu hujjat 2019-yil 25-noyabrda Parijda qabul qilingan bo‘lib, BMT tizimidagi oliy ta’lim sohasiga oid birinchi global bitim hisoblanadi.
Konvensiyaning maqsadi — turli davlatlarda olingan diplom va malakalarni adolatli, shaffof va teng asosda tan olish, shuningdek, talabalar, o‘qituvchilar va tadqiqotchilarning xalqaro harakatchanligini kengaytirishdir.
Mazkur bitim ratifikatsiyasi natijasida xorijda olingan diplomlarni tan olish jarayoni sezilarli darajada yengillashadi, bu esa O‘zbekiston yoshlariga xorijda o‘qish va ishlashda, shuningdek, xorijlik mutaxassislarning mamlakatimizda faoliyat yuritishida yangi imkoniyatlar yaratadi. Bundan tashqari, konvensiya O‘zbekistonning ta’lim sohasidagi ilg‘or davlatlar bilan hamkorligini mustahkamlab, ilmiy almashinuv va akademik hamkorlikni kengaytirishga xizmat qiladi.
