O‘zbekistonda seysmik xavfsizlikni ta’minlash sohasida sun’iy intellekt texnologiyalari joriy etiladi. Bu borada Prezidentning “Seysmik xavfsizlikni ta’minlash va seysmologiya sohasidagi ishlar samaradorligini oshirishga oid qo‘shimcha chora-tadbirlar to‘g‘risida”gi farmoni qabul qilindi.
Farmonga ko‘ra, 2026-yil 1-yanvardan boshlab sun’iy intellekt yordamida kuchli zilzilalarni o‘rta va uzoq muddatlarda prognoz qilish amaliyoti yo‘lga qo‘yiladi. Dastlabki bosqichda loyiha Toshkent shahri misolida amalga oshiriladi.
Shuningdek, madaniy meros obyektlari va transport inshootlarining zilzilabardoshligini monitoring qilish tizimi yaratilib, Registon, Buxoro Ark majmuasi va Xiva Ichan-qal’a kabi yodgorliklarda kuzatuv ishlari olib boriladi. Bundan tashqari, A-373 va M-39 avtomobil yo‘llari, tog‘li temiryo‘l hududlarida ko‘chki xavfini kosmik monitoring qilish, bino va inshootlarning zilzilabardoshligini sun’iy intellekt yordamida tahlil qilish tizimi ham bosqichma-bosqich joriy etiladi.
