Surxondaryo viloyati hokimligida Boshqaruv samaradorligi agentligining viloyat filiali hamda Yaponiya xalqaro hamkorlik markazi (JICE) hamkorligida inson resurslarini rivojlantirishga qaratilgan seminar tashkil etildi.
Seminarda JICEning O‘zbekistondagi JDS loyihasi ofisi rahbari Tomomi Igarashi, Boshqaruv samaradorligi agentligining viloyat filiali mas’ul xodimlari, viloyat hokimligi boshqaruv apparati va tegishli boshqarma hamda tashkilotlar vakillari ishtirok etdilar.
Tadbir davomida ishtirokchilarga Yaponiya hukumati tomonidan amalga oshirilayotgan inson resurslarini rivojlantirish bo‘yicha JDS grant dasturi haqida batafsil ma’lumot berildi. Shuningdek, tanlovda ishtirok etish shartlari va mezonlari, Yaponiyaning yetakchi universitetlarida magistratura (2 yil) va doktorantura (3 yil) dasturlariga qabul jarayonlari haqida tavsiyalar berildi.
