Surxondaryo viloyatida o‘qituvchilarning bilimini e’tirof etish va ularning mashaqqatli mehnatini munosib qadrlash maqsadida yirik ilmiy bellashuv – “Bilimdon ustoz – 2025” olimpiadasi bo‘lib o‘tdi. Ushbu nufuzli tadbir viloyat Maktabgacha va maktab ta’limi boshqarmasi hamda “Surxon sanoat qurilishi” kompaniyasining hamkorligida tashkil etildi.
Viloyatimizdagi matematika va fizika fani fidoyilari o‘rtasida o‘tkazilgan olimpiadaning barcha bosqichlarida ikki mingga yaqin ustoz qatnashdi. Ular orasidan eng bilimdon, eng izlanuvchan o‘qituvchilar saralab olindi.
Yakunda quyidagi fidoyi ustozlar faxrli birinchi o‘rin sohibi bo‘lishdi:
🔹 Matematika fani bo‘yicha – Dilshod Sattorov, Sariosiyo tumanidagi 74-maktab o‘qituvchisi
🔹 Fizika fani bo‘yicha – Abbos Boltayev, Termiz tumanidagi 14-maktab o‘qituvchisi.
G‘olib ustozlarga tantanali tarzda DAMAS rusumli avtomobillar topshirildi. Ularni taqdirlash marosimida viloyat Maktabgacha va maktab ta’limi boshqarmasi boshlig‘i Xusniddin Mamadiyev hamda “Surxon sanoat qurilishi” kompaniyasi rahbari Bahodir Qodirov ishtirok etdi.
Bu mukofotlar nafaqat ustozlarning mehnatini qadrlash, balki yosh avlodni tarbiyalash yo‘lida bor kuch-g‘ayratini ayamayotgan o‘qituvchilarga bo‘lgan chuqur hurmat va e’tibor ifodasidir.
