Surxondaryo viloyatida og‘ir turmush sharoitida yashayotgan, ijtimoiy ko‘makka muhtoj 141 nafar xotin-qizning uy-joy sharoitlarini yaxshilash, jumladan, 28 ta oila uchun yangi uy-joylar qurish, 113 ta oilaning mavjud turar joylarini ta’mirlash ishlari olib borilayotganidan xabaringiz bor.
Viloyat hokimi Ulug‘bek Qosimov Termiz tumanida mazkur vazifalar ijrosini o‘rgandi. Xususan, tumanning “Do‘stlik” mahallasida yashovchi Hayitgul Shernazarov va Gulbahor Quvondiqovalarning xonadonida bo‘lib, turar joylarining ta’mirlanishini ko‘zdan kechirdi hamda oilalarning muammolarini o‘rgandi. Shuningdek, mas’ullar manzilli ro‘yxat asosida xotin-qizlarning uy-joy sharoitlarini yaxshilash tadbirlari ijrosi yuzasidan axborot berdi. Mas’ullarga oilalarni qo‘llab-quvvatlash, xotin-qizlarning ijtimoiy faolligini oshirish va munosib hayot sharoiti yaratish yuzasidan aniq vazifalar topshirildi.
