Termiz shahri umumta’lim maktablarining 11-sinf bitiruvchilari uchun unutilmas kun bo‘ldi — 49 nafar o‘quvchi oltin medal, 17 nafari esa kumush medal bilan taqdirlandi. Bu e’tibor — nafaqat o‘quvchilarning mehnati, balki ularning ustozlari, ota-onalari hamda butun ta’lim tizimi fidoyilarining fidokorona mehnatlari samarasi, sifatli ta’limga berilgan yuksak bahodir.
Tantanali marosimda Termiz shahar hokimi Sharofiddin Lolayev hamda Surxondaryo viloyati maktabgacha va maktab ta’limi boshqarmasi boshlig‘i Husniddin Mamadiyev ishtirok etib, medal sohiblarini samimiy muborakbod etdilar, ularning kelgusi hayotiga ulkan zafarlar tiladilar. Medal sohiblari sahnaga ko‘tarilgan onlarda faxr va quvonchga to‘la nigohlar, hayajon va shukronalik aralashgan ko‘z yoshlar — bu daqiqalar Termiz ta’lim tizimi uchun faxrli sahifaga aylandi.
Har yili medal egalari sonining ortib borayotgani — yurtimizda amalga oshirilayotgan ta’lim islohotlarining, o‘quvchilarning bilimga bo‘lgan intilishi va ustozlarning mashaqqatli mehnatining yorqin natijasidir. Shuningdek, Termiz shahar Madaniyat bo‘limining iste’dodli ijodkorlari tomonidan tayyorlangan badiiy chiqishlar yig‘ilganlarga bayramona kayfiyat ulashdi. Kuy-qo‘shiqlar, she’rlar va sahna ko‘rinishlari bitiruvchilar uchun unutilmas lahzalarni hadya etdi.
