Yurtimizda atrof-muhitni muhofaza qilish, ekologik barqarorlikni ta’minlash va fuqarolarning sog‘lom turmush tarzini qo‘llab-quvvatlash maqsadida keng ko‘lamli loyihalar amalga oshirilmoqda. Shulardan biri — har yili ikki bosqichda o‘tkaziladigan “Toza havo” ekologik tadbiridir.
An’anaga ko‘ra, “Toza havo” tadbirlari 10-apreldan 10-maygacha va 10-avgustdan 10-sentabrgacha bo‘lgan davrlarda o‘tkaziladi. Ayni paytda Surxondaryo viloyatida ushbu oylikning birinchi bosqichi jadal davom etmoqda. Tadbirlar viloyat Ichki ishlar boshqarmasi, Yo‘l harakati xavfsizligi bo‘limi va boshqa tegishli idoralar bilan hamkorlikda tashkil etilib, butun hudud bo‘ylab yo‘l harakati ishtirokchilarining ekologik madaniyatini oshirishga qaratilmoqda.
Oylik doirasida “Manguzar” patrul post maskanida tashkil etilgan tadbirda avtomashinalar texnik ko‘rikdan o‘tkazilib, haydovchilarga tushunchalar berilayotir. Barcha haydovchilardan o‘z transport vositalarini texnik jihatdan soz holatda saqlashlari, ekologik talablarga javob beradigan yoqilg‘i sarfi va chiqindi gaz miqdoriga alohida e’tibor qaratishlari so‘ralmoqda. Bu nafaqat atrof-muhit, balki o‘zimiz va yaqinlarimiz salomatligi uchun ham muhimdir.
Temur G‘oyibnazarov,
Viloyat Ekologiya, atrof-muhitni muhofaza qilish va iqlim o‘zgarishi boshqarmasi matbuot xizmati rahbari
