Yo‘llar ravon, manzil yaqin

Prezidentimizning Surxondaryo viloyatini ijtimoiy-iqtisodiy rivojlantirishga qaratilgan qaror, farmon va topshiriqlari hamda davlat dasturlari doirasida hududlarda keng ko‘lamli bunyodkorlik ishlari amalga oshirilmoqda.
Bugun viloyat hokimi bu borada olib borilayotgan ishlar bilan tanishish maqsadida Boysun tumaniga tashrif buyurdi. Dastlab, “Darband–Boysun–Elbayon” (4R-105) hamda 4R-100 avtomobil yo‘llaridagi qurilish-ta’mirlash ishlari bilan tanishdi. Mas’ullar tomonidan loyihalar ijrosi yuzasidan axborot berildi. Shuningdek, “Omonxona” dam olish maskaniga olib boruvchi yo‘l bo‘yida zamonaviy “Kemping” majmuasi qurish loyihasi taqdimoti ham ko‘rib chiqildi.
Tashrif davomida “Yangi O‘zbekiston” massivida barpo etilayotgan ko‘p qavatli uylar, “Xo‘jamayxona” suv inshooti, tuman tibbiyot birlashmasidagi laboratoriya va ayollar maslahatxonasi binolari qurilishi ham o‘rganildi.
Mutasaddilarga ishlar sifatini nazorat qilish va belgilangan muddatlarda yakunlash bo‘yicha topshiriqlar berildi. Yakunda davlat dasturlari va qurilish sohasidagi vazifalar ijrosi tanqidiy-tahliliy muhokama qilindi hamda kelgusi chora-tadbirlar belgilab olindi.