Yana 90 nafar bola bog‘chaga boradi

Qiziriq tumanining Takiya mahallasida 24-sonli Davlat maktabgacha ta’lim tashkiloti foydalanishga topshirildi. Zamonaviy uslubda qurilgan ushbu maktabgacha ta’lim tashkiloti 90 o‘ringa mo‘ljallangan bo‘lib, loyiha qiymati 3 milliard 430 million so‘mni tashkil etadi.
Tantanali ochilish marosimida bog‘cha jamoasi va bolajonlar quvonchiga sherik bo‘lganlar yangi binodagi shart-sharoitlar, bolajonlar uchun yaratilgan imkoniyatlar bilan tanishdi. Ushbu dargoh endigina tashqi olam haqida bilimlarni o‘zlashtirishni boshlagan murg‘ak qalblar uchun ta’lim-tarbiya o‘chog‘i bo‘lib xizmat qilishi aniq.