Maktab bitiruvchilari o‘rgangan kasb-hunari bo‘yicha imtihon topshiradi

Bunga oid hujjat loyihasi e’lon qilindi. Unga ko‘ra endi umumta’lim maktablarining 11-sinf bitiruvchilari o‘rgangan kasb-hunari bo‘yicha yakuniy imtihon topshiradi. Imtihondan muvaffaqiyatli o‘tgan o‘quvchigina davlat namunasidagi elektron sertifikat oladi.
Kasb-hunar bo‘yicha yakuniy imtihon maktab direktori buyrug‘i asosida tashkil etiladi. Imtihon kuni va vaqti oldindan belgilanib, 15 kun avval e’lon qilinadi. Baholash mezonlari va savollar vazirlik tomonidan ishlab chiqiladi. Imtihonni o‘tkazish uchun tarkibida kamida 5 nafar a’zo bo‘lgan komissiya tuziladi, ulardan ikkitasi ish beruvchilar bo‘lishi mumkin. Natijalar imtihon tugagan kunning o‘zida e’lon qilinadi, imtihonga qatnasha olmaganlar esa 1-iyulgacha qayta topshirish imkoniyatiga ega bo‘ladi.
Sertifikat bitiruvchining kasbiy malakasini tasdiqlaydi va ularni mehnat bozorida faol bo‘lishiga yo‘l ochadi. Sertifikat elektron platforma orqali bepul taqdim etiladi. Har yili 25-iyunga qadar sertifikatlar tayyor bo‘ladi. U yo‘qolgan yoki yaroqsiz holga kelgan taqdirda, platformadan yana yuklab olish mumkin.