Psixologlar forumi bo‘lib o‘tdi

Bola bilan ishlash uchun, eng avvalo, uning psixologiyasini yaxshi bilish lozim. Ana shundagina ularning iqtidorlarini yuzaga chiqarish oson kechadi. Shu sababdan ham maktabgacha va maktab ta’limida psixolog mutaxassislarning xizmatiga ehtiyoj sezamiz. O‘z navbatida psixologlarning o‘z ustida ishlashlari, yangi bilim va ko‘nikmalarni egallab, amaliyotda qo‘llashlari yaxshi natija beradi.
Surxondaryo viloyati Maktabgacha va maktab ta’limi boshqarmasi tomonidan “Maktabgacha va maktab ta’limi tizimidagi ijtimoiy-psixologik xizmat va kasb-hunarga yo‘naltirishda innovatsion yondashuv” mavzusida Jarqo‘rg‘on tumanidagi 66-umumta’lim maktabida psixologlar forumi bo‘lib o‘tdi. Unda maktabgacha va maktab ta’limi tashkilotlari psixologlari uchun sohaga doir taqdimotlar qilindi. Tizimda kelgusida amalga oshiriladigan istiqbolli vazifalar belgilandi.
Forum davomida sohada faollik ko‘rsatib kelayotgan bir guruh psixologlar munosib rag‘batlantirildi.