Faol yoshlar yetakchilari e’tirof etildi

Yoshlar yetakchilarining ishi mahallalarrda bekorchi, ishsiz, jinoyatchilikka moyil yoshlar bo‘lmasa seziladi. To‘g‘ri-da, yetakchi mahalladagi yoshlarni bunyodkorlikka, yaratuvchanlikka boshlashi, sportga, tadbirkorlikka, san’at-u ijodga oshno eta olishi, o‘ziga ergashtirishi lozim. O‘tgan vaqt mobaynida esa yetakchilar bu ishlarning uddasidan chiqa oldilar. Chiqa olmaganlar esa o‘z o‘rnini faol, tashabbuskor yetakchilarga bo‘shatib berdi.
Yoshlar ishlari agentligi tomonidan mahallalarda ish olib borayotgan yoshlar yetakchilarining 2024-yil II chorak davomidagi faoliyati tahlil qilindi. Va mamlakatimizdagi TOP-100 yoshlar yetakchilari reytingi e’lon qilindi. Quvonarlisi, ana shu yoshlar yetakchilari reytingida surxondaryolik 7 nafar yoshlar yetakchilari ham bor.
Surxondaryo viloyati Yoshlar ishlari boshqarmasi boshlig‘i A.Xurramov tomonidan ushbu reytingga kiritilgan yoshlar yetakchilari va ularning ota-onalariga minnatdorchilik xatlari topshirildi.