Otaxonu onaxonlar uchun…

Xalqimizda kichiklarga izzatda, kattalarga nisbatan hurmatda bo‘lish yuksak insoniylik, qadriyat tusini olgan tushunchadir. Xonadonimizda momo-bobomiz bormi, ularga doimiy e’tibor qaratib, g‘amxo‘rlik ko‘rsatamiz. Duolarini olishga, kayfiyatlarini ko‘tarishga urinamiz. Bunda bir hislat bor aslida. Ana shunday piru badavlat onaxon va otaxonlarimizning-da vaqtlarini mazmunli o‘tkazish, dildan yayrab, ko‘ngil yozishlari uchun Termiz shahrida nuroniylar maskani faoliyat olib boradi.
U yerda nuroniy otaxon va munis onaxonlarimiz uchun barcha qulayliklar yaratilgan. Kutubxona, choyxona, ma’naviyat, tibbiyot xonalari, sport-sog‘lomlashtirish zali deysizmi, bari o‘ziga xos va mos jihozlangan. Ayniqsa, bino atrofida keng ko‘lamdagi obodonlashtirish va ko‘kalamzorlashtirish ishlari bajarilgan bo‘lib, yangi va ko‘rkam ko‘rinishga ega majmuaga kelgan kishining bahri dili ochilishi aniq.