Prezident tashabbusi bilan har haftaning payshanba kuni “Yoshlar kuni” etib belgilangan bo‘lib, bu kunlarda yoshlar bandligini ta’minlashga qaratilgan turli tadbirlar tashkil etilmoqda. Shu munosabat bilan Sariosiyo tumani “Yangi O‘zbekiston” istirohat bog‘idagi Ma’naviyat maskanida bo‘sh ish o‘rinlari mehnat yarmarkasi o‘tkazildi. Tadbir tuman hokimligi, prokuratura, Yoshlar ishlari bo‘limi hamda Kambag‘allikni qisqartirish va bandlikka ko‘maklashish bo‘limi hamkorligida tashkil etildi.
Mehnat yarmarkasida 24 ta davlat va nodavlat tashkilotlari ishtirok etib, jami 134 ta bo‘sh ish o‘rni taklif qilindi. Tadbir davomida yoshlar va fuqarolarga mehnat huquqi hamda bandlik masalalari bo‘yicha huquqiy maslahatlar berildi. Yakunda 12 nafar ishsiz yosh ish bilan ta’minlandi, 56 nafar fuqaroga esa mehnat va bandlik masalalari yuzasidan huquqiy tushuntirishlar berildi.
