Xususiy universitet delegatsiyasi Yevropada

Surxondaryo viloyatida birinchi litsenziyaga ega xususiy oliy ta’lim muassasasi bo‘lgan Termiz iqtisodiyot va servis universitetining bir guruh professor-o‘qituvchilari va talabalari Chexiya davlatida bo‘lib, “Yevropa universitetlarida zamonaviy ta’lim yutuqlari va texnologiyalari” mavzusida qisqa muddatli malaka oshirish kurslarida ishtirok etishdi.
Shuningdek, o‘quv amaliy mashg‘ulotlarida ishtirok etib, Yevropaning zamonaviy oliy ta’lim tizimi, uning samaradorligi va yangi texnologiyalari bilan tanishishdi. Yevropalik professor-o‘qituvchilar, malakali mutaxassislar bilan o‘zaro tajriba almashishdi.
Tashrif davomida Termiz iqtisodiyot va servis universiteti hamda Chexiya Respublikasi poytaxti Praga shahrida joylashgan, ko‘p yillik tajribaga ega Yevropa amaliy fanlar va menejment instituti o‘rtasida hamkorlik memorandumi imzolandi. Ilmiy, o‘quv-uslubiy yo‘nalishlarda aloqalarni yanada kengaytirish, kelgusida qo‘shma ta’lim dasturlarini yo‘lga qo‘yish, hamkorlikda o‘quv darsliklari yaratish masalalarida kelishuvlarga erishildi.