Imtihon qachon?

G‘alvir suvdan ko‘tariladigan muddat ham keldi. Yigit-qizlar bilimlarini sinovdan o‘tkazish maqsadida imtihonga kirishadi. Xo‘sh, imtihon qachon? Muddatning aniq belgilanishi esa yoshlarning hayajonini oshirishi aniq. Turli sabablarga ko‘ra imtihon kunlari va o‘tkazilish tartibiga har yili qator o‘zgartirishlar kiritildi. Bu yilgi 2023-2024-o‘quv yili uchun oliy ta’lim muassasalariga kirish test sinovlari esa 2023-yil 1-avgust kunidan boshlanadi. Test sinovlari kuniga ikki smenada o‘tkazilib, 1️-smenada 08:00 dan 11:00 ga qadar, 2️-smenada 15:00 dan 18:00 ga qadar bo‘lib o‘tadi.
Test sinovlari hududlardagi abiturientlar soni va test sinovlari o‘tkaziladigan binolar sig‘imidan kelib chiqqan holda 11 kundan 13 kungacha davom etadi. 13-avgust kuni to‘liq yakunlanadi. Shuningdek, 2023-2024-o‘quv yilida oliy ta’lim muassasalarining bakalavriat ta’lim yo‘nalishlariga o‘qishga kirish uchun onlayn ro‘yxatdan o‘tgan abiturientlarga “Abiturient ruxsatnomasi”ni berish ham boshlangan. “Abiturient ruxsatnomasi”ni my.uzbmb.uz saytiga shaxsiy identifikatsiya raqami hamda pasport seriyasi va raqamini kiritgan holda olishlari mumkin.
Hurmatli abiturientlar, test sinoviga pasport (ID-karta) va abiturient ruxsatnomasi bilan belgilangan vaqtdan kechikmagan holda kelishingiz lozim. Unutmang, pasport nusxasi yoki boshqa hujjatlar bilan kelgan, shuningdek, kechikib kelgan abituriyentlar test sinovlariga kiritilmaydi.