Bolalar surat chizdi

Bolaning qo‘liga rangli qalamlar va qog‘oz tutsangiz, u darrov chizishga tutinadi. Kimdir kapalak, quyoshni, kimdir bulutlarni, boshqalar esa oila a’zolarini chizib, turli ranglarda bo‘yaydi. Bolajonlarning ijodiy ishlariga qarab, ularning kayfiyatini, ruhiyatidagi o‘zgarishlarni ham bilib olish qiyin emas.
Ammo, nima bo‘lganda ham surat solish, ijod qilish eng yaxshi va foydali mashg‘ulot. Denov tumanidagi nodavlat maktabgacha ta’lim tashkilotlarining birida esa “Rassom bolajon” nomli tadbir tashkil etildi. Unda bolajonlar miriqib surat chizdilar. Jamoa bo‘lib ishladilar.
Aytish kerakki, bolajonlar ma’lum maqsad sari yo‘naltirilgan faoliyat bilan qanchalik erta shug‘ullansa, shunchalik tez zaruriy bilim va tajribaga ega bo‘ladilar, dunyoqarashlari kengayadi, tasavvur ufqlarida qanot qoqa boshlashadi. Maktabgacha ta’lim tashkilotlarida bolalarga o‘yin tarzida ta’lim berish jarayonida noan’anaviy usulda rasm chizish o‘rgatilib, zarur malaka va ko‘nikmalar shakllantiriladi.