Transafg‘on temir yo‘li qurilsa…

Pokiston, O‘zbekiston va Afg‘oniston transafg‘on temir yo‘li qurilishi bo‘yicha qo‘shma protokolni imzoladi. U O‘zbekiston temir yo‘llari tarmog‘ini Afg‘oniston hududi orqali Pokiston temir yo‘llari bilan bog‘laydi. Temir yo‘l arteriyasining yo‘nalishi O‘zbekistonning Termiz, Afg‘onistonning Mozori Sharif va Logar shaharlaridan o‘tib, Kurram viloyatidagi Xarlachi chegara punktida Pokiston hududiga yetib boradi.
Hisob-kitoblarga ko‘ra, Afg‘oniston orqali o‘tadigan 760 kilometr temir yo‘l Pokistonga yuklarni yetkazib berish muddatini taxminan besh kunga, transport xarajatlarini esa kamida 40 foizga qisqartiradi.
Qiymati 6 milliard dollargacha bo‘lgan loyiha 2027-yil oxirigacha yakunlanadi, 2030-yilgacha poyezdlar transafg‘on temir yo‘li bo‘ylab yiliga 15 million tonnagacha yuk tashish imkoniyatiga ega bo‘ladi.