Vazir o‘rinbosari TerDUda

Oliy ta’limga hujjat topshirib, ijodiy-kasbiy imtihonlar oldida turibmiz. Xo‘sh, universitetlarda imtihonlarga tayyorgarlik qay darajada? Ayni savollarga javob topish maqsadida vazirning birinchi o‘rinbosari Komiljon Karimov Surxondaryoga keldi.
Dastlab K. Karimov Termiz davlat universiteti binosida 2023/2024-o‘quv yilida qabul jarayonlarini o‘tkazishga mas’ul bo‘lgan tashkilotlar rahbarlari, viloyatdagi barcha oliy ta’lim muassasalari rektorlari ishtirokida yig‘ilish o‘tkazdi.
Tashrif davomida qabul jarayonlari va imtihonlarni o‘tkazish, bu borada abituriyentlar va ularning ota-onalariga munosib shart-sharoit yaratish bo‘yicha oliygohda amalga oshirilgan ishlarni o‘rgandi. So‘ng, jami 840 o‘rinli test imtihonlari hamda ijodiy imtihonlar bo‘lib o‘tadigan majmualarni ham ko‘zdan kechirdi. Aytish lozimki, ushbu binolar test jarayonlarining shaffof o‘tkazilishi uchun kuzatuv kameralari hamda to‘liq sovutish tizimlari bilan jihozlangan.
Vazirning birinchi o‘rinbosari jarayonlar bilan tanishar ekan, qabul jarayonlarini munosib sharoitda o‘tkazish bo‘yicha o‘zining zarur taklif va tavsiyalarini berdi.