Surxondaryo viloyati bo‘ylab g‘alla yig‘im-terimi ayni qizg‘in tus olgan. Mavsumni uyushqoqlik bilan boshlagan dala mehnatkashlarining oldida turgan muhim masalalardan biri bitta ham boshoqni isrof qilmay yig‘ib terib olishdir. Yana bir jihat borki, pishib yetilgan boshoqlarni yong‘indan asrab, xavfsizligini ta’minlash lozim. Ayni maqsadda Qiziriq tumanida Fuqaro muhofazasi boshlig‘i rahbarligida Favqulodda vaziyatlar davlat tizimi xizmatlari bilan hamkorlikda tuman Donni qabul qilish maskanida maxsus taktik o‘quv mashg‘uloti o‘tkazildi.
Maqsad esa har xil turdagi favqulodda vaziyatlarni va yong‘in xavfsizligining oldini olishdir.
Mashg‘ulotda tuman hokimi Sh.Rajabov, otryad rahbarlari hamda sohaga daxldor tashkilot va korxonalar rahbarlari ishtirok etdilar. G‘allani o‘z vaqtida, sifatli yig‘ishtirib olishda yong‘in xavfsizligini ta’minlash, don mahsulotlarini yong‘indan asrash, texnikalarning shayligi muhim hisoblanadi. Shu bois o‘rim-yig‘imga jalb etilgan texnikalarning texnik sozligi, birlamchi yong‘in o‘chirish vositalari bilan ta’minlanganligi ko‘rikdan o‘tkazildi.
Shuningdek, mutasaddilar, ishchi-xizmatchilar va haydovchilar o‘rtasida yong‘in xavfsizligi qoidalariga rioya qilishlari ogohlantirildi.
Hilol
