Janub gavhari bo‘lmish Surxon vohasining har bir hududi o‘ziga xos, tabiati, iqlimi, yer unumdorligi jihatidan kelib chiqib mahsulot yetishtirish mumkin. Ayniqsa, suv masalasida muammo yo‘qligi mo‘l-ko‘l hosil garovi bo‘lib xizmat qiladi. Qishloq xo‘jaligi mahsulotlari bo‘yicha har bir hududning ixtisoslashuvi haqida gap ketganda turgan gapki, Muzrabot deganda sholikorlik yodimizga tushadi. Muzrabot guruchlarining sifati, navlari, qolaversa, narx jihatidan ham aholi uchun qulay.
Sholichilikni yanada kengaytirish maqsadida Muzrabot tumanida “SCT cluster sholi” MCHJ tomonidan Amudaryo qirg‘oqlaridagi 20,1 ming gektar yer maydonida sholi yetishtirish va qayta ishlash loyihasi amalga oshirilayotganidan xabardormiz. Ana shunday ishlarning davomi sifatida yangidan ochilib, o‘zlashtirilayotgan yer maydonlarining birinchi bosqichi ekin ekishga tayyorlanayotir. Birinchi bosqichda 7 ming gektar maydonni sholi ekishga tayyorlash uchun 100 ga yaqin traktor va maxsus texnikalar yordamida shudgorlash, lazerli tekislash, ariq-zovurlarni tozalash kabi tadbirlar amalga oshirilmoqda.
Qolgan 13,1 ming gektar maydonda esa begona o‘tlardan tozalash, tekislash va shudgorlashga tayyorlash ishlari qizg‘in tus olgan. Surxondaryo viloyat rahbari jarayonlarni ko‘zdan kechirdi. Ishlarni jadallashtirish, qolgan maydonlarni ham ekin ekishga tayyorlash bo‘yicha kerakli ko‘rsatma va tavsiyalarini berdi.
S.Murodova
