“Universiada” sport musobaqalari talaba-yoshlarni bir maqsad yo‘lida birlashtirib, sport turlari bo‘yicha o‘z iqtidor va mahoratlarini namoyish etishga imkoniyat yaratadi. Har yili muntazam ravishda o‘tkazib kelinayotgan ushbu sport musobaqalarida esa munosiblar saralanib, taqdirlanib kelinadi. Bu safar ham xuddi shunday bo‘ldi.
Buxoro “Humo” sport majmuasida oliy ta’lim muassasalari talabalari o‘rtasida “Universiada” sport musobaqasining sportning kurash turi bo‘yicha respublika final bosqichi bo‘lib o‘tdi. Bilagida kuchi, yuragida o‘ti bor alplar maydonga tushib kurashdilar. Aytish kerakki, kurash qiziqarli va murosasiz vaziyatlarga boy bo‘ldi. Dostonlarda kuylanganidek, polvonlar ikki kun kurashdilar, or uchun talashdilar.
Albatta, mezbon polvonlarining qo‘li baland kelib, birinchilikni qo‘ldan boy berishmagan bo‘lishsa, toshkentlik polvon-talabalar ikkinchilikka da’vogar bo‘lishdi. Surxondaryolik polvon-talabalar ham quruq qo‘l bilan qaytishmadi, har qalay uchinchi o‘rin bilan yuzlarini yorug‘ qilishdi.
Hilol
