Yilning qay faslida chiroq o‘chsa, o‘chsinki, qishda o‘chmasin. Elektr pechlarda uyini issiq tutib turgan yosh bolali va keksasi bor oilalarga bunday holat qiyinchilik tug‘dirishi aniq. 5 daqiqaga qolmay xonalar sovib qolishi hech gap emas.
Boysun tumanidagi “Sho‘rsoy” mahalla fuqarolar yig‘iniga qarashli Toba ko‘chasida istiqomat qilguvchi aholi qishni tez-tez chiroq o‘chishlar bilan o‘tkazdi desa ham bo‘ladi. Ayniqsa, anomal sovuqda bu o‘chishlar sezilarli darajada ta’sir qildi. Soha xodimlari nosozlikni o‘z vatida bartaraf etishdi, ammo…
Mahalla hududidagi 207-sonli 250–KVA quvvatga ega transformator anchayin eski va 276 nafar xo‘jalikka xizmat qilishga quvvati yetmadi. Qolaversa, uzoq yillar mobaynida yaroqsiz holga kelib qolgan ushbu transformator aholini ko‘plab murojaatlari va e’tirozlariga sabab bo‘lib kelayotgan edi.
Ushbu nosozlikning oldini olish va elektr energiyasidagi uzilishlarni bartaraf etish maqsadida tuman hokimining tashabbusi bilan yaroqsiz holga kelib qolgan simlar 2500 metr SIP kabellariga almashtirildi. Eski simyog‘ochlar o‘rniga temirbeton simyog‘ochlar o‘rnatilib, foydalanishga yaroqsiz bo‘lib qolgan transformator yangisiga — 400-KVA quvvatga ega transformatorga almashtirib berildi. Natijada aholi sifatli elektr energiyasi bilan ta’minlandi.
Sohibjamol
