Anomal sovuqda jonimizni asraymiz. Uyimizdagi mol-holimizga g‘amxo‘rlik ko‘rsatamiz. Nima bo‘lsa ham sovuqdan eson-omon chiqib olsak bo‘lgani. Ammo, mana shunday ob-havo sharoitida hech o‘ylab ko‘rganmikanmiz, tabiiy muhitda hayot kechiradigan jonivorlarning ahvoli nima kechadi. Ozuqa topishi qiyinlashmaydimi? Albatta, turgan gapki, ularning jon saqlab qolishlari haqiqiy muammoga aylanadi. Yemish qidirgan jonivorlar muhofaza hududidan chiqib, aholi yashash joylariga borib qolishi turgan gap. Oxir-oqibat esa ovchi va brokonerlarga o‘lja bo‘lishlari hech gap emas. Mana shunday holatlarning oldini olish, qolaversa, ochiqlikda, tabiiy muhitda yashovchi jonivorlaning hayotini asrab qolish maqsadida Surxondaryo viloyati Ekologiya va atrof-muhitni muhofaza qilish boshqarmasi tashabbusi bilan joylarda biotexnik tadbirlar amalga oshirilayotir.
Birgina Muzrabot tumanini oladigan bo‘lsak, tumandagi yastanib yotgan dashtliklarda 30 dan ortiq hayvon turlari hayot kechiradi. Hududdagi bioxilma-xillikni asrab qolish maqsadida maxsus joylar tayoyorlanib, yem to‘kib chiqildi. Mana shunday chora-tadbirlar orqali o‘simlikxo‘r jonivorlar, qushlarning ham muhofazasi ta’minlanadi.
Hilol
