Millat tarixini, madaniyati va qadriyatlarini bugungi va kelajak avlodga yetkazadigan eng muhim vositalardan biri shubhasizki, bu uning tili hisoblanadi. Til nafaqat nutq vositasi, balki davlatning timsoli va qimmatli mulkidir.
21-oktabr esa “O‘zbek tiliga davlat tili maqomi berilgan” kun. Shu munosabat bilan Termiz davlat universiteti axborot resurs markazida o‘zbek filologiyasi fakulteti tomonidan “Qadring baland bo‘lsin – ona tilim!” deb nomlangan tadbir tashkil etildi. Fakultet dekani, professor-o‘qituvchilari hamda faol talabalar ishtirok etgan tadbirda ona tilimiz ulug‘landi.
Alisher Navoiy, Zahiriddin Bobur, Ogahiy, Avloniy, Cho‘lpon singari buyuk bobolarimiz ijod qilgan turkiy tilning qimmati, qiymati va jozibasi haqida fikrlar bildirildi. O‘zbek tilini ulug‘lovchi she’rlar, g‘azal va ruboiylar o‘qildi. Diltortar navolarga, go‘zal raqslarga ulangan kecha barchaga manzur bo‘ldi.
Hilol
