Prezident Shavkat Mirziyoyev tomonidan Surxondaryo viloyatini ijtimoiy-iqtisodiy rivojlantirish masalalari yuzasidan o‘tkazilgan yig‘ilishda yil yakuniga qadar Muzrabot tumanida 56 ming aholiga ilk bor markazlashgan ichimlik suvi yetkazib berish loyihasini yakunlash, shuningdek, tuman markazida kanalizatsiya tarmoqlarini barpo etishni boshlash vazifasi belgilab berilgan edi.
Mazkur topshiriqlar ijrosini ta’minlash maqsadida “O‘zsuvta’minot” AJ boshqaruv raisi Axmad Suvankulov Muzrabot tumanida bo‘lib, mahalla faollari bilan uchrashdi.
Loyiha doirasida 479,2 kilometr ichimlik suvi tarmoqlari quriladi, 18 ta suv taqsimlash inshooti qurish va rekonstruksiya qilinadi. Shuningdek, umumiy quvvati sutkasiga 24,3 ming kub metr bo‘lgan 2 ta ichimlik suvi olish inshooti barpo etilib, 9 686 ta suv hisoblash uskunasi o‘rnatiladi.
Qurilish ishlari to‘liq yakunlangach, 26 ta mahallada yashovchi 56 ming nafar aholi ilk bor markazlashgan ichimlik suvi bilan ta’minlanadi. Shu bilan birga, yana 54 ming nafar aholining ichimlik suvi ta’minoti sezilarli darajada yaxshilanadi.
