Yoshlar festivali shahar va tumanlar miqyosida ko‘tarinki ruhda o‘tkazilayotir. Ayniqsa, yoshlarning o‘ziga xos ishtiyoq va kayfiyat bilan ishtirok etayotgani ko‘rgan va kuzatgan kishida bir olam zavq-shavq tuyg‘usini uyg‘otadi.
Boysun tumanidagi “Yoshlar istirohat bog‘ida” “Yangi O‘zbekiston yoshlari, birlashaylik!” shiori ostida bo‘lib o‘tgan yoshlar festivali ham ana shunday his-hayajonlarga boy bo‘ldi.
Festival bahonasida tashkil etilgan sport musobaqalari, bilimlar bellashuvi o‘g‘il-qizlarning vaqtini chog‘ o‘tkazishga yordam berdi. Bir tomonda bilagida kuchi, yuragida o‘ti borlar maydonga tushib kurashsa, boshqa yoqda tosh ko‘tarishda tengi yo‘qlar saralandi.
“Zakovat” intellektual o‘yinida bilimlar bellashdi, maharatli jamoalarning nomi festivalda ovoza bo‘ldi.
“Bayram bayramdek bo‘lsin” deguvchi mutasaddilar tomonidan tashkil etilgan yoshlar sayli hamda gala konsert dasturi kutilmagan tuhfa bo‘ldi deyish mumkin. Muhimi bu kunni boysunlik yoshlar o‘zgacha shukuh bilan eslashadi.
Shuningdek, bayram dasturi davomida festivalda faollik ko‘rsatgan, tanlov va musobaqalarda g‘olib bo‘lgan yoshlar tuman hokimi tomonidan munosib rag‘batlantirildi.
S.Murodova
