Butun hayotini kitobga oshno tutinish bilan o‘tkazish, kitoblar olamida yashashdan ortiq baxt bo‘lmasa kerak. Qo‘lini uzatsa yetadigan joyda turma-tur eng sara adabiyot durdonalari turgan chog’da uni olib o‘qimaslik, kitobning uvoliga qolishdan boshqa narsa emas. Oramizda umrini, mehnatini kitobga oshno etib, tom-tom adabiyotlar quchog’ida baxtiyor yashayotgan kutobxonachilar ham bor. Ularning ham mehnatini ardoqlash, yosh avlodga ziyo ulashish yo‘lidagi kamtarona xizmatlarini qadrlash maqsadida 2020-yilda ilk marotaba “Axborot-kutobxona a’lochisi” ko‘krak nishoni ta’sis etilgan edi.
Joriy yilda mazkur ko‘krak nishoniga vohamizdan to‘rt nafar kutubxonachi munosib ko‘rildi. Jumladan, Adib Sobir Termiziy nomidagi viloyat axborot kutubxona markazi xizmat rahbari Dilrabo Sattorova, Boysun tumani AKM xizmat rahbari Ra’no Vahobova, TerDU ARM yetakchi mutaxassisi Mavluda Xalilova, Denov tumanidagi 1-son kasb-hunar maktabi kutubxona mutaxassisi Malohat Usmanovalar ayni shunday sharafga sazovor bo‘lgan kutubxonachilardir.
Viloyat hokimi o‘rinbosari Jo‘rabek To‘rayev “Axborot-kutubxona a’lochisi” ko‘krak nishoni bilan taqdirlangan bir guruh kutubxonachilarga mukofotlarni tantanali ravishda topshirdi.
Ta’kidlash joizki, mazkur ko‘krak nishoniga sazovor bo‘lgan soha fidoyilariga bazaviy hisoblash miqdorining to‘rt baravari qiymatidagi bir yo‘la to‘lanadigan pul mukofoti ham beriladi.
Kutubxona – nurxona, deya bejiz aytilmagan, qalblarga, ongu shuurimizga ziyo ulashishdan bevosita kutubxonachilarning ahamiyati katta.
E.Elmurodova
