Yodgorliklar, qadimiy buyumlar o‘z davridan, zamonasidan ajib hikoya so‘zlaydi. Tarix bilan yuzlashtirgandek bo‘ladi. Ayniqsa, ana shunday buyumlar shodasini siz topib olsangiz, olamshumul topilma topgandek quvonib ketishingiz tayin. Sariosiyo tumanidagi Alisher Navoiy mahallasida yashovchi fuqarolar ham bugun ana shunday hayoajonda. Negaki, ular To‘palang daryosi qirg‘og‘idan juda ko‘p miqdordagi mis tangalarni topishdi. Olimlar mazkur ashyolar hozirgacha vatanimiz hududidan topilgan Mirzo Ulug‘bek hukmronligi davrida zarb ettirilgan pul tangalarining eng katta va yaxshi saqlangan xazinasi ekanligini ta’kidlashmoqda.
Qadimiy tangalarning bir tomonida olti qirrali yulduz va olti yaproqli gul zarb qilingan bo‘lib, bu hukmdorning buyuk astronom va matematikligi tufayli kiritilgan belgilardir. Shuningdek, tangalarning reversida, ya’ni bet tarafida “Samarqand”, “Adliya” so‘zlari, hijriy 823 (1420-yil), 832 (1428-yil) kabi zarb qilingan yillari aks etgan.
S.Allayeva
