Yangi o‘quv yilining boshlanganiga ham bir oy bo‘lyapti. O‘quvchi-yoshlar allaqachon an’anaviy ta’limga moslashib, o‘qishlarini izga solib ulgurdi. Demak, o‘qishdan tashqari qoladigan vaqtni to‘g‘ri taqsimlash muddati yetgan. Bunday paytda qo‘shimcha dars mashg‘ulotlari bilimlarimizni mustahkamlasa, ijodiy va sport to‘garaklari, til va hunarmandchilik saboqlari har jabhada sayqal topishga yordam beradi.
Ba’zan yoshlarni to‘g‘ri yo‘naltira olish, qiziqish va layoqatini hisobga olish ham muhim. Aks holda vaqt behuda o‘tishi hech gap emas. Shu maqsadda Jarqo‘rg‘on tuman Madaniyat bo‘limi tasarrufidagi Surxon madaniyat markazi ijodiy to‘garak rahbarlari tumandagi umumta’lim maktablarida bo‘lishdi. O‘quvchilar bilan suhbatlashib, ijodiy to‘garaklarga qiziqishi bor yoshlarni jalb qilishdi.
To‘garak rahbarlarining jonkuyarligini ularning targ‘ibot-tashviqotlaridan, o‘quvchilar bilan munosabatidan bilish qiyin emas. umid qilamizki, qisqa fursatlarda Surxon madaniyat markazi qoshidagi ijodiy to‘garaklarga o‘rganish ishtiyoqida yonayotgan iqtidorli safi kengayadi.
S.Davlatova
