Termizdagi “Surxon” sport majmuasi uch viloyat yoshlarini bir maydonda jamladi. Surxondaryo, Samarqand va Qashqadaryo jamoalari qatnashgan fijital sport musobaqasida 36 ta jamoa jismoniy mahorat va raqamli texnologiyalar uyg‘unligida o‘zaro bellashdi.
Murosasiz kechgan bahslarda Termiz davlat universitetining “TerDU” jamoasi fijital futbolda, Qiziriq tumani sport maktabining “Qiziriq-1” jamoasi fijital basketbolda g‘oliblikni qo‘lga kiritdi. Just Dance yo‘nalishida Elina Italmazova, CS2 kibersport bahslarida esa Jarqo‘rg‘on tumanining “Aura” jamoasi birinchi o‘rinni egalladi.
Musobaqaning dastlabki ikki o‘rin sohiblari respublika final bosqichida qatnashish huquqini qo‘lga kiritdi. G‘olib va sovrindorlar diplom hamda esdalik sovg‘alari bilan taqdirlandi.
Fijital sport ixlosmandlari uchun navbatdagi bellashuvlar 20–23-oktabr kunlari Farg‘ona shahridagi “Samo” sport majmuasida bo‘lib o‘tadi.
